Polisi yawashikilia wanane Dodoma

JESHI la Polisi Mkoani Dodoma linawashikilia watu wanane kwa kukutwa

na madawa ya kulevya aina ya bangi na mirungi pamoja na zana za

kufanyia uhalifu.

Kamanda wa Polisi Mkoa wa Dodoma Kamishna Msaidizi Mwandamizi wa

Polisi (SACP) David Misime alisema kukamatwa kwa watu hao kunatokana

na msako unaoendelea wa kupambana na wahalifu na uhalifu uliofanyika

eneo la Chang'ombe Machi 11, mwaka huu.

 

kamanda misime

Katika msako huo Polisi waliwakamata watuhumiwa hao wakiwa na kilo

moja na  misokoto 104 ya bangi, mirungi gram 500  zana za kuvunjia

yakiwemo mapanga, mikasi, visu na nondo.

Kwa mujibu wa Kamanda Misime msako huo ulihusisha zaidi kero za

uvutaji wa bangi na kupelekea kufanya uhalifu katika maeneo

mbalimbali Manispaa ya Dodoma.

Aliwataja waliokamatwa kuwa ni Halfan Muheza (25), Stewart Sylvester

(18), Shaban Ibrahim (18), Abdallah Idd (18), Fikiri Jonas (20), Ally

Nuru (30), Saimon Zabron (43) na Albert Charles (18)  wote wakazi

Chang'ombe Manispaa ya Dodoma.

Kamanda Misime alisema watuhumiwa wote watafikishwa mahakamani leo

kujibu tuhuma zinazowakabili.

Pia alisema Jeshi la Polisi linaendelea kumtafuta Dereva wa gari

linalosemekana kuwa ni Toyota Land Cruiser GX Standard rangi nyeupe

baada ya kumgonga mpanda baiskeli aliyefahamika kwa jina la Julias

Sanduku (50) Mkazi wa Gairo katika eneo la Kijiji cha Visimi Kibaigwa

na kumsababishia kifo mpanda baiskeli huyo.

Alisema dereva huyo alikuwa akitokea Dodoma kuelekea Morogoro baada ya

kumgonga mpanda baiskeli,alishuka kutoka ndani ya gari na kumwangalia

aliyemgonga alipogundua amefariki akageuza gari kurudi njia ya Dodoma

na kuwaambia wananchi waliojitokeza kuwa anaenda kutoa taarifa jambo

ambalo hakufanya.

 Kamanda Misime aliwaomba wananchi wenye taarifa na dereva huyo alipo

wajulishe katika kituo chochote cha Polisi ili aweze kukamatwa.